Tengo ‘nu cane ch’è fenomenale,
se chiamma “Dick”,
‘o voglio bbene assaie.
Si perdere ll’avesse? Nun sia maie!
Per me sarebbe un lutto nazionale.
Mm’ ‘aggio crisciuto
comm’a ‘nu guaglione
cu zucchero, biscotte e papparelle;
ll’aggio tirato su cu ‘e mmullechelle
e ll’aggio dato buona educazione.
Gnorsì, mo è gruosso. è quase giuvinotto.
Capisce tutto… lle manca ‘a parola.
è cane ‘e razza, tene bbona scola,
è lupo alsaziano, è poliziotto.
Chello ca mo ve conto è molto bello.
In casa ha stabilito ‘a gerarchia.
Vo’ bene ‘a mamma ch’è ‘a signora mia,
e a figliemo isso ‘o tratta da fratello.
‘E me se penza ca lle songo ‘o pate:
si ‘o guardo dinto a ll’uocchie mme capisce,
appizza ‘e rrecchie, corre, m’ubbidisce,
e pe’ fa’ ‘e pressa torna senza fiato.
Ogn’anno, ‘int’a ll’estate, va in amore,
s’appecundrisce e mette ‘o musso sotto.
St’anno s’è ‘nnammurato ‘e na bassotta
ca nun ne vo’ sapè: nun è in calore.
Povero Dick, soffre ‘e che manera!
Porta pur’isso mpietto stu dulore:
è cane, sí… ma tene pure ‘o core
e ‘o sango dinto ‘e vvene… vo’ ‘a, mugliera…

da “'A livella”, 1968
di Antonio De Curtis "Totò